"L'ANGELO D'A' CASA A' MAMMA"


 

L’ANGELO D' 'A CASA  'A MAMMA
 
'A dummeneca mmatina
quanno jevo addu mammà
a chesta criatura 'e uttant'anne
'a facevo cumpagnia
e ce metteveme a cantà.
M' 'aspettava 'a vicchiarélla
mentre steva a cucenà
s'affacciava d' 'o balcone
pe' me' vedè arrivà.
M' accuglieva c'allerezza 
for' 'a porta se metteva a cantà
'o dòce s'aspettava
ma i' pazzianno lle dicevo:
Sta nchiuso, 'o pastìcciero
pe' nu sciopero" mammà!
Ma po' abbracciannola fòrte
ovèro nce creduto oj' mà?
Essa 'e bòtto rispunneva:
"Jammo mé, nun pazzià
'o cartòccio addò  l'hé miso?
Ca i' nu poco 'e dòce 'o vvòglio mò
prìmm' 'e magnà!"
Curre, va' a piglià 'o cartòccio
ca s'ammosciano 'e sfugliate
e se seccano e babbà.
Mammà, ch'ê cucenato?
Ih'... ch' 'addòra ca se sente!..
T' haggio fatto 'o purpettone
c'uva passa e ch'e pignuole
cu nu poco d'aglietiéllo
e na vranca 'e parmiggiano
comme tanto piace a ttè!
E alluccànno io lle dìcevo:
" i' che bella vicchiarélla",
e astregnennola int' 'e bracce
mille vase 'a devo 'nfaccia
comme fosse na criatura.
E che gioia dint' 'a stu core
e che bene te vulevo
ma ogni cosa è de passàggio
e si nu cuoglie sti mumente
nun rummane pròpeto niente.
Mammà, mò ca nun te veco cchiù
'o penziero mio è tranquillo. pecchè
tu ll' hê ditto e ìo l'haggio 'ntiso:
"Sto cu Ddio bell' 'e mammà!"

Ritorna ai titoli